Saga af bláu sumri
1.290 kr.Saga af bláu sumri fjallar um unga konu sem sest að í húsi látinnar ömmu sinnar yfir sumartímann.
Ég velti fyrir mér hvort kjörbúðin væri enn á sínum stað því ég hafði alveg gleymt að líta eftir því þegar ég gekk í gegnum bæinn úr rútunni daginn áður. Stúlkan sem ég sá á leiðinni hafði fangað alla athygli mína. Eftir á að hyggja þótti mér í raun merkilegt að ég skyldi hafa gengið rétta leið heim að húsinu en ekki ráfað eitthvað út í bláinn eftir að hún hvarf mér sjónum.
„Strax með fyrstu bókinni, Ást og appelsínur, varð ljóst að hér var komin skáldkona sem hafði þegar fundið sína rödd.“
– Úlfhildur Dagsdóttir, BókmenntavefurinnÞórdís Björnsdóttir er fædd í Reykjavík árið 1978. Hún hefur sent frá sér ljóðabækurnar Í felum bakvið gluggatjöldin, Vera & Linus, Og svo kom nóttin, og Ást og appelsínur. Þetta er hennar fyrsta skáldsaga.
Þjóðerni í þúsund ár?
1.290 kr.Í þessari bók takast ungir fræðimenn af ýmsum sviðum hug- og félagsvísinda á við spurningar sem tengjast íslensku þjóðerni og sögu þess. Meðal þess sem tekið er til athugunar eru sjálfsmyndir fyrir daga nútíma þjóðernishyggju, mótun þjóðernis og hugmyndir Íslendinga um stöðu sína meðal þjóða heimsins. Hverjir tilheyra hinni íslensku þjóð og hverjir ekki? Eru það ef til vill huldufólk eða vestfirskir sérvitringar sem eru hin eina sanna íslenska þjóð?
Bókin um simpansana
2.990 kr.„Til þess að geta boðið börnum bók um dýr og mælt skilyrðislaust með henni verður maður að vera fullviss um að höfundurinn hafi til að bera staðgóða og trausta þekkingu á efninu. Enginn í heiminum skilur simpansa betur en Jane Goodall. Þar við bætist að hún lýsir þeim með hlýju og gamansemi svo að umfjöllun vísinda- mannsins verður bæði börnum og fullorðnum sannur skemmtilestur. Myndir bókar- innar tala líka skýru máli og sýna glöggt að enginn hefur kynnst hópi villtra dýra betur en Jane Goodall simpönsunum sínum.“
Konrad Lorenz, nóbelsverðlaunahafi í dýrafræði.Bókin hlaut fyrstu verðlaun alþjóðlegs verðlaunasjóðs barnabóka 1989.
Hún er í flokki bóka sem fjalla um fjölskyldur dýra – einkum tengsl móður og afkvæmis.
Næsta bók okkar í flokknum segir frá „villta“ íslenska hestinum.
Bréf til Sólu
1.290 kr.Bréf til Sólrúnar Jónsdóttur frá Þórbergi Þórðarsyni skrifuð 1922-1931
Þessi bréf eru ástarbréf og eiga engan sinn líka í íslenskum bókmenntum. Enda eru þau varðveitt fyrir undarlega tilviljun, eins og glöggt kemur fram í inngangi Indriða G. Þorsteinssonar fyrir bókinni.
Og þessi bréf segja ástarsögu sem er bæði falleg og fagurlega skráð. Og sú saga á vafalaust eftir að valda lesendum ýmsum heilabrotum.
Sóla og Þórbergur unnust hugástum, það sjáum við glöggt af bréfunum. En hvers vegna auðnaðist þeim ekki að njótast? „Bagga mín. Þetta er svo löng saga,“ sagði Sóla við Guðbjörgu dóttur sína, þegar hún gekk á hana um sambandsslitin. Að öðru leyti er málið hulið þögn af hennar hálfu.
Guðbjörg er dóttir Sólrúnar og Þórbergs og hafa báðir foreldrar hennar skilið eftir yfirlýsingar því til staðfestingar. En hún hefur ekki fengið það viðurkennt af dómstólum. Eru þau undarlegu mál skýrð hér og rakin í inngangi fyrir bréfunum og málsskjöl og dómsniðurstöður birtar í bókarlok.
Jón Leifs: Líf í tónum
1.290 kr.Tónskáldið Jón Leifs var einn merkasti og óvenjulegasti listamaður okkar á 20. öld. Í miðri heimsstyrjöldinni fyrri sigldi hann til Þýskalands, aðeins sautján ára gamall, staðráðinn í að leggja tónlistina fyrir sig þótt ekki hefði hann nema óljósan grun um hvað í því fælist. Hann kvæntist konu af gyðingaættum en bjó þó í Þýskalandi fram til ársins 1944, fluttist þá til Svíþjóðar þar sem ný ást og stór harmur biðu hans, og þaðan aftur heim til Íslands – í annars konar stríð og á vit enn nýrrar ástar.
Saga hans er saga manns sem var of stór fyrir Ísland þess tíma – stórbrotinn metnaður hans og bjargföst trú á heilaga köllun í tónlistinni varð honum bæði gæfa og ógæfa. Jón var um margt langt á undan sinni samtíð, varð fyrstur Íslendinga til að stjórna fullskipaðri sinfóníuhljómsveit, hljóðritaði íslensk þjóðlög þegar þau voru einskis metin, stofnaði STEF og samdi tónlist sem mörgum þótti óþolandi hávaði en er nú talin með því merkasta sem gert hefur verið í íslenskri tónlist fyrr og síðar.
Árni Heimir Ingólfsson skráir lífshlaup Jóns Leifs í þessari dramatísku ævisögu og hefur velt við hverjum steini í leit sinni að heimildum um líf hans. Bók hans er einstakur lykill að lífi þessa umdeilda listamanns. Fjölda áður óbirtra ljósmynda er að finna í bókinni.
Bókin var tilnefnd til Íslensku bókmenntaverðlaunanna 2009.
Nýr penni í nýju lýðveldi
1.290 kr.Hvað er þetta, spyr ég og bendi á lokaðar dyr í holinu. Þetta er chambre horreur, kallar Elías innan úr stofu. Íbúðin er á fyrstu hæð við Birkimel 6a, baðherbergi og eldhús snúa út að bílaplani, svefnherbergi og stofa snúa út í garð. Elías situr á stól í stofunni, langur og mjór með krosslagða fætur, tekur út úr sér munnstykki og blæs frá sér þykku reykskyi sem blandast rykögnum í sólskininu sem berst inn um stofugluggann. Eitt augnablik virðist hann ætla að liðast upp með reyknum og hverfa.
Kvæði 87
1.490 kr.„SKÁLDI, sem ræktað hefur auðkennilegan persónulegan stíl og með honum fágaða tækni til að miðla öðrum heimssýn sinni og sköpunarþörf, eru ýmsar leiðir opnar, kjósi það á annað borð að hlýða fyrirmælum skáldagyðjunnar áfram og láta ekki staðar numið í endurtekningunni. Vissulega má deila um það hvenær ef nokkurn tíma tiltekið skáld standi frammi fyrir þessu átakamikla og oft á tíðum ósjálfráða uppgjöri við sjálft sig og listina, og reyndar hafa skriflegar vangaveltur af þessu tagi orðið eins konar atvinnugrein í ýmsum stærri menningarsamfélögum.
Einmitt í þessum sporum, þó að honum hafi ef til vill ekki verið það fyllilega ljóst, stóð Kristján Karlsson að loknu öndvegisverki sínu, New York. Verk hans voru orðin svo flókin og samtvinnuð þar sem hvert kvæði vitnaði til annarra á ótal vegu að hann var kominn að ystu mörkum almenns skilnings og átti á hættu að útiloka allt nema eigin hugarheim frá veröld kvæðanna einmitt vegna þess hve stórtæk og djúp skynjun hans var orðin. Nokkur kvæðanna í New York höfðu þegar birst sem sjálfstæðar nærmyndir í bók frá 1981 og hinn mikli bálkur um stórborgina var ekki annað en eðlileg útlistun og víkkun kjarnans. En varla voru menn búnir að átta sig á efnistökum skáldsins þegar út var komið annað safn, Kvæði 84, sem virðist að minnsta kosti fljótt á litið marka þáttaskil á skáldferli Kristjáns.“
„Hvert einasta atriði þeirra [kvæðanna] krefst þess af lesandanum, að hann byrji aftur og endurskoði verkin í heild og launar honum með nýrri innsýn. Fá skáld á okkar tímum, á Íslandi og þótt víða væri leitað, hafa slíka kosti til brunns að bera.“
Bernard Scudder
(Úr ritdómi í Skírni og ritgerð í Morgunblaðinu).Ofanskráð ummæli snerta vissulega kjarna málsins og eru jafnframt gott sýnishorn úr margvíslegum lofsamlegum dómum sem skáldskapur Kristjáns Karlssonar hefur hlotið.
Sú nýja bók sem nú birtist mun trúlega verða talin rökrétt framhald af Kvæðum 84, en á hinu er enginn vafi að hún markar ennþá ný þáttaskil í ljóðagerð höfundarins.
Alla mína stelpuspilatíð
1.290 kr.Hvert hafa spor hálfsextugrar stelpu legið?
Hvers vegna þræddi hún þessa leið en ekki hina?
Og hvert fór eiginlega tíminn?
Sigríður Kristín er frá Garði í Mývatnssveit, dóttir Jakobínu Sigurðardóttur rithöfundar og Þorgríms Starra Björgvinssonar bónda og hagyrðings, komin af Reykjahlíðar- og Skútustaðaætt og af kjarnafólki á Hornströndum. En hún naut þess ekki alltaf eins og hún segir hispurslaust frá í þessari ögrandi og „öðruvísi“ ævisögu. Auk þess að lýsa því hvernig var að alast upp í norðlenskri sveit á sjöunda og áttunda áratug síðustu aldar, þar sem foreldrarnir voru kommar og húsfreyjan skrifaði bækur með „orðbragði“, dregur hún upp litríka mynd af ættmennum sínum, einkum konunum og þá fyrst og fremst móður sinni, veltir fyrir sér hlutskipti kynjanna í fortíð og nútíð – og dásamar þá tilviljun sem lífið er.
Í húsi Júlíu
1.290 kr.Í húsi Júlíu (2006) segir frá tveimur systrum og stormasömum samskiptum þeirra. Þegar Lena kemur heim öllum að óvörum eftir áratuga langa dvöl í útlöndum og sest að í húsi Júlíu fara þau hjól að snúast sem bjóða hættunni heim.
Viðfangsefnin í þessari skáldsögu Fríðu Á. Sigurðardóttur eru mörg og áleitin og á sinn einstaka hátt vefur Fríða saman alla þræði svo að úr verður áhrifamikil og mögnuð samtímasaga. Í húsi Júlíu er einstaklega vel skrifuð, fyndin og fáguð og í henni kveður við nýjan tón í íslenskri bókmenntaflóru. En umfram allt er hér tekið á málum sem brenna á nútímakonunni: Hvers vegna fórna konur sér iðulega fyrir aðra?
Fríða Á. Sigurðardóttir er einn virtasti rithöfundur þjóðarinnar. Hún hefur sent frá sér smásögur, skáldsögur og þýðingar. Skáldsaga hennar Meðan nóttin líður (1990) hlaut Íslensku bókmenntaverðlaunin, Menningarverðlaun DV í bókmenntum og Bókmenntaverðlaun Norðurlandaráðs 1992 og hefur verið þýdd og gefin út víða erlendis.
Krossfiskar
1.290 kr.Enn horfði ég á vatnið. Mér fannst ekkert eðlilegra en að vera þar sem ég var, einmitt núna. Ég sá að ævi mín var bara undanfari pessa augnabliks.
Daníel er hættur í háskólanum og hefur hvorki efni á mat né eldsneyti. Dag einn fær hann tvö símtöl, eitt frá fyrrverandi skólafélaga og annað frá lögreglunni, sem hrinda af stað dularfullri atburðarás.
Krossfiskar er spennuþrungin skáldsaga um átök sálarinnar – um mörk góðs og ills. vonar og vonleysis – frá einum af áhugaverðustu ungum höfundum þjóðarinnar.
Stjörnur og stórveldi: Á leiksviðum Reykjavíkur 1925-1965
1.290 kr.Þetta er svolítið óvenjuleg bók. Hún er blanda af fræðimennsku og sagnaskemmtan, leiklistargagnrýni og leiklistarsögu, persónulegum endurminningum og hugleiðingum. Þegar höfundur hefur hana nú fyrir sér fullsamda læðist þó að honum sá grunur að hún sé fyrst og síðast ástarjátning hans til leiklistarinnar sjálfrar. Hún er skrifuð sem safn stuttra ævisagna, æviþátta, um þá leikara sem ásamt hópi yngri starfsfélaga sinna gerðu íslenska atvinnuleiklist að veruleika um miðja síðustu öld. Allir voru þeir hver með sínum hætti mikilhæfir listamenn, enginn þeirra alfullkominn, en þegar upp var staðið höfðu þeir á fjórum áratugum eða svo gefið þjóðinni leikhús sem hún mat mikils og vildi ekki vera án. Og á sjöunda og áttunda áratug aldarinnar hreif list þessa fólks svo ungan dreng að hann setti leiklistina öðrum listum ofar og helgaði henni starfskrafta sína fulltíða maður.
JVJÍ bókinni er nýstárlegum aðferðum beitt til að varpa ljósi á merkan kafla í íslenskri leiklistarsögu. Höfundur segir sögu allra helstu leikara tímabilsins, sigra þeirra og ósigra, jafnframt því sem hann gerir valdabaráttunni að tjaldabaki ítarleg skil. Hann hefur kannað ógrynni heimilda við undirbúning verksins og dregur fram í dagsljósið margt sem legið hefur í þagnargildi allt til þessa dags. Það er síst ofsagt að bókin sé hvalreki fyrir alla sem áhuga hafa á leiklist og íslenskri menningarsögu síðustu aldar.
Jón Viðar Jónsson hefur verið um árabil einn helsti leiklistargagnrýnandi þjóðarinnar. Hann varð stúdent frá Menntaskólanum í Reykjavík árið 1975 og lauk doktorsprófi í leiklistarfræðum frá Stokkhólmsháskóla árið 1996. Á árunum 1982 til 1991 var hann leiklistarstjóri Útvarps. Hann gegndi stöðu forstöðumanns Leikminjasafns Íslands frá stofnun þess árið 2003 til 2012. Jón Viðar hefur fengist jöfnum höndum við fræðastörf og leiklistar- gagnrýni, ritað ævisögur Stefaníu Guðmundsdóttur leikkonu og Jóhanns Sigurjónssonar, annast útgáfu á heildarsöfnum leikrita Jökuls Jakobssonar og Guðmundar Steinssonar, auk þess sem hann hefur birt fjölda greina og ritgerða um leiklistarsögu og skyldar greinar í blöðum og tímaritum.
Vígroði
1.290 kr.Auður djúpúðga elur upp son sinn á eigin jörð á Katanesi. Hún hefur haldið sig fjarri Suðureyjum frá því að leiðir hennar og Ólafs hvíta Dyflinnarkonungs skildu af ótta við að Ketill flatnefur, faðir hennar, gefi hana manni á ný.
Að veturnóttum 865 kemur hún þó í föðurhús, til brúðkaups bróður síns og dóttur Ingólfs Arnarsonar. Þar spá dísirnar því að vígroða muni brátt slá á víkinga í Vesturhafi. Og víst horfir ófriðvænlega á norðanverðum Bretlandseyjum þar sem innfæddir veita norrænum mönnum æ meiri mótspyrnu og Orkneyjajarl ásælist aukin völd. Þá ræðst Dyflinnarkonungur inn í Péttland, öllum að óvörum, og leiðir þeirra Auðar liggja saman að nýju …
Vígroði er framhald af skáldsögunni Auður sem kom út 2009, naut geysilegra vinsælda og var tilnefnd til Íslensku bókmenntaverðlaunanna.
Gratíana
1.290 kr.Langþráð framhald Hansdætra. Leiftrandi örlaga- og þroskasaga ungrar konu sem tekst á við sjálfa sig og viðteknar venjur í byrjun tuttugustu aldar.
Þær framtíðarvonir sem Gratíana bar í brjósti sér eru að engu orðnar eftir þrjú ár í Bótarbugt en Evlalía móðir hennar er óbuguð enn. Með kænsku hreyfir hún við lífshjólinu og markar nýja stefnu, ekki aðeins fyrir sjálfa sig, heldur ekki síst Gratíönu og Ásdísi. Glóð kvenréttinda lifir í hjarta Gratíönu en samhliða kvikna aðrir logar sem hún brennir sig á, skilur ekki til fulls og veit ekki hvort hún vill glæða eða slökkva.
Speglahúsið
1.990 kr.Miðaldra hárgreiðslukonan Rósa leggur skærin á hilluna, flytur austur í Mjóafjörð og kemur á fót óvenjulegri ferðaþjónustu. Meðan ferðamenn setja sig í spor Lísu, sem lá lömuð þar um miðja síðustu öld, bakar Rósa fyrir kaffihúsið og hugsar til ömmu sinnar sem sá um Lísu og heimilið.
Mögnuð saga frá höfundi Hansdætra.