Algjör Perla
4.990 kr.Algjör Perla er glæný bók úr smiðju Jónínu Leósdóttur, sem hefur skrifað á þriðja tug bóka – þar á meðal tvær geysivinsælar glæpasagnaseríur kenndar við Eddu og Sáló ehf. Alþekkt kímnigáfa Jónínu nýtur sín sérstaklega vel í þessari margslungnu og hlýlegu sögu sem kemur sífellt á óvart.
Þegar Perla rankar við sér á Landspítalanum eftir heilablóðfall snýst hennar fyrsta hugsun aðeins um eitt: Bévað líkið, sem getur alveg ómögulega verið áfram þar sem það er.
En hvað getur hálflömuð manneskja á áttræðisaldri tekið til bragðs í slíkri stöðu? Vitanlega getur hún ekki blandað nokkrum í svo viðkvæmt mál. En það má komast ansi langt á þrjóskunni og hugvitinu einu saman … og stundum fær kona í neyð liðsauka úr óvæntustu átt.
Þórarinn Eldjárn – Úrval smásagna
9.990 kr.36 smásögur úr áður útgefnum bókum, 1981-2021.
Kristján Þórður Hrafnsson valdi sögurnar og ritaði eftirmála.
Edda – myndskreytt
5.990 kr.Snorri Sturluson skrifaði Eddu í Reykholti á árunum í kringum 1220. Verkið er eitt mikilvægasta framlag norrænna þjóða til evrópskar menningar og geymir fjölmargar skemmtilegar sagnir af hinum fornu goðum og hetjum: ævintýri guðanna gölmu, Óðins, Þórs, Baldurs, Freyju, Friggjar, Iðunnar og allra hinna, að ógleymdum hinum brögðótta Loka. Edda greinir einnig frá upphafi heimsins og endalokum hans í ragnarökum. Í þessari bók er birt úrval sagna og þær gerðar aðgengilegar almenningi.
Nóvella – Ævintýrið (notuð)
1.990 kr.Í þessari bók eru birtar tvær sígildar sögur eftir Goethe sem notið hafa mikillar hylli meðal bókmenntaunnenda allt frá því þær komu fyrst fyrir almenningssjónir fyrir tveimur öldum.
Þetta eru sögurnar Nóvella, um söngelska drenginn með flautuna og ljónið og tigrísdýrið sem sleppa úr búrum sínum hjá mannfólkinu, og Ævintýrið, um grænu slönguna og fögru liljuna þar sem vafurlogar og konungar koma við sögu.
Tvær töfrandi frásagnir, samdar af mikilli list.
Jón Bjarni Atlason annaðist útgáfuna, íslenskaði Nóvellu og ritaði eftirmála.
Kristján Árnason og Þórarinn Kristjánsson íslenskuðu Ævintýrið.
Þýski menningarjöfurinn Johann Wolfgang Goethe (1749–1832) var skáld, leikskáld, skáldsagnahöfundur, náttúruvísindamaður, leikhússtjóri, stjórnmálamaður, gagnrýnandi og listamaður. Meðal frægustu verka hans er leikritið Fást (Faust) og skáldsögurnar Raunir Werthers unga (Die Leiden des jungen Werthers) og Wilhelm Meisters Lehrjahre.
Í hæfilegu magni
5.190 kr.Kraftmikil ljóðabók um litríka uppreisn gegn þeim þrönga stakki sem samfélagið sníður konum. Bók sem er of hávær, of fjörug og fjallar um allt of stórar tilfinningar.
Í hæfilegu magni er fyrsta ljóðabók Heiðu Vigdísar Sigfúsdóttur (f. 1992) en hún bar sigur úr býtum í handritasamkeppni Forlagsins, Nýjum röddum, árið 2022 með sögunni Getnaði. Saga hennar Stúlkan sem skemmdi (næstum því) jólin varð hlutskörpust í samkeppninni um Jóladagatal Borgarbókasafnsins og Bókmenntaborgarinnar 2021.
Og svo varð ég forsetafrú
6.990 kr.Eliza Reid rifjar hér upp eftirminnilegan tíma sem forsetafrú Íslands og veitir lesendum innsýn í heim þar sem formlegheitin ráða ríkjum og opinberar heimsóknir og móttökur eru stór hluti af starfinu. Hún lét til sín taka í því sem henni þótti skipta máli, var óhrædd við að tala íslensku með erlendum hreim og hló að eigin mismælum. Hún talaði fyrir jafnrétti kynjanna og gerði góðlátlegt grín að þeirri þversögn að vera fyrst og fremst skilgreind út frá afrekum eiginmannsins.
Í bókinni segir Eliza einnig frá uppvexti sínum í Kanada, árunum í Bretlandi, ferðalögum á fjarlægar slóðir og hvernig það var að flytja til Íslands og verða útivinnandi fjögurra barna móðir.
Köngurváfa
5.190 kr.Köngurváfa er önnur ljóðabók Arndísar Þórarinsdóttur en þar tekst hún á við tilvistina með textum sem spretta úr upprunanum og horfa til framtíðar. Bókin spinnur þræði um formæður, fluguhnýtingar, ferðalög og stórtónleika heilmynda ABBA-flokksins, svo fátt eitt sé nefnt.
Fyrri ljóðabók Arndísar, Innræti, hlaut góðar viðtökur og var tilnefnd til Íslensku bókmenntaverðlaunanna árið 2020. Arndís er jafnframt ötull barna- og ungmennabókahöfundur og hefur meðal annars fengið Íslensku bókmenntaverðlaunin, Fjöruverðlaunin og Barnabókaverðlaun Reykjavíkurborgar fyrir verk sín, auk tilnefninga til Barna- og unglingabókmenntaverðlauna Norðurlandaráðs, Þýsku barnabókaverðlaunanna og Minningarverðlauna Astridar Lindgren.
Kona að hálfu
4.390 kr.Ponna og Kali reyna hvað þau geta til að eignast barn en allt kemur fyrir ekki. Síðasta hálmstráið er lokakvöld árlegrar musterishátíðar, þegar allir karlar eru guðir, en það gæti reynst þeim dýrkeypt.
Perumal Murugan (f. 1966) er þekktasti rithöfundur Tamli Nadu-héraðs á Indlandi og jafnframt eini tamílski höfundurinn sem hlotið hefur tilnefningu til alþjóðlegu Booker-verðlaunanna. Lýsingar hans á helgisiðum héraðsins í Kona að hálfu vöktu mikla reiði trúarhópa á svæðinu og mátti Murugan sæta ofsóknum og ákærum, sem hæstiréttur í Madras ógilti síðar. Kona að hálfu hefur verið þýdd á átján tungumál. Áður hefur komið út á íslensku bókin Saga af svartri geit eftir sama höfund.
Framtíðin á ferðinni
4.690 kr.Stelpa og strákur hittast óvænt í erlendri borg og verða ástfangin. Þau koma úr ólíkum menningarheimum og átta sig fljótt á því að þeirra bíða margar og erfiðar hindranir eigi heitar tilfinningar að dafna. Ástin er voldugt afl en nær miskunnarlaus veruleikinn að buga hana?
Í þessari hugstæðu skáldsögu tekst Þórhildur Ólafsdóttir á við áleitið efni sem lítt hefur verið fjallað um í íslenskum bókmenntum. Sagan talar beint til nútímans þótt höfundur sviðsetji hana í Reykjavík, París og litlu þorpi á Íslandi fyrir hálfri öld. Löngu liðnum tíðaranda er lýst á næman og áhrifaríkan hátt og persónur bókarinnar verða ljóslifandi fyrir augum lesenda.
Ólöf Þórhildur Ólafsdóttir lauk doktorsprófi í frönskum bókmenntum við Háskólann í Orléans í Frakklandi árið 1982. Hún var lektor og síðar dósent í frönsku við Háskóla Íslands í nokkur ár. Frá árinu 1988 hefur hún verið búsett í Strasbourg í Frakklandi þar sem hún starfaði við Evrópuráðið í aldarfjórðung. Hún hefur áður sent frá sér meðal annars skáldsögu og ljóðabók auk þýðinga á bókum Nóbelsverðlaunahafans Annie Ernaux.
Minnisblöð veiðimanns (kilja)
5.390 kr.Skáldjöfurinn Ívan Túrgenev kynntist snemma bágum kjörum rússneskra bænda og miskunnarleysi þeirra sem réðu yfir þeim. Hann ólst upp á landareign móður sinnar, sem þótti með eindæmum óvægin og grimm, en hún hafði yfir að ráða meira en fimm þúsund sálum eins og ánauðugir bændur voru gjarnan nefndir. Reynsla Túrgenevs úr uppvextinum varð honum innblástur í þessa bók, Minnisblöð veiðimanns, sem kemur nú út í fyrsta sinn á íslensku.
Í Minnisblöðum veiðimanns ferðast sögumaður um sveitir Rússlands og hittir landeigendur, ráðsmenn, bændur og bóndakonur auk annarra minnisstæðra persóna. Hann lýsir þessu fólki með raunsönnum og eftirminnilegum hætti en sagan er þó ekki síður óður til rússneskrar náttúru – birkiskóganna og sveitarinnar.
Þegar bókin kom út árið 1852 var Túrgenev handtekinn og sendur í útlegð á ættaróðal sitt. Bókin er þó sögð hafa haft mikil áhrif á Aleksander II. Rússakeisara en það var hann sem steig loks það afdrifaríka skref að aflétta bændaánauðinni árið 1861.
Áslaug Agnarsdóttir íslenskaði og ritaði eftirmála.
Suðurríkjaherforinginn frá Big Sur
4.690 kr.Í þessari bráðfyndnu og furðulegu sögu slást lesendur í för með félögunum Jesse og Lee. Sá síðarnefni er sannfærður um að hann sé afkomandi gleymds hershöfðingja úr bandaríska borgarastríðinu. Frá hriplekum forstofum í San Francisco liggur leiðin til klettaveggja Big Sur þar sem lífið snýst um froskakvak, vináttu, ódýr vín, blekkingar, hamingju og leitina eilífu að tilgangi lífsins.
Suðurríkjaherforingi frá Big Sur var fyrsta skáldsaga stílsnillingsins Richard Brautigan og er löngu orðið klassískt verk í bandarískum nútímabókmenntum.
Þórður Sævar Jónsson íslenskaði.
Stíll hans og vitsmunir miðla svo mikilli orku að … Brautigan … fær öll skilningarvitin til að anda. – Newsweek
Heillandi, pirrandi og hræðilega fyndin bók.– San Francisco Chronicle
Ótrúleg saga … Þú verður sáttari við heiminn eftir að hafa lesið hana. – Los Angeles Examiner
Hermiskaði
1.290 kr.Katniss Everdeen hefur sloppið lifandi frá tvennum Hungur- leikum en líf hennar er dýru verði keypt. Tólfta umdæmi er brunnið til grunna en Kapítól hefur ekki enn svalað hefndarþorsta sínum … Uppreisnarmenn vilja að Hermiskaðinn verði sameiningartákn í stríðinu gegn Kapítól.
Katniss er á báðum áttum – en á hún nokkurra kosta völ ef hún vill bjarga ástvinum sínum? Smám saman rennur þó upp fyrir henni að hlutverk Hermiskaðans kann að verða henni þungbærara en nokkrir Hungurleikar.
Hermiskaði er lokabindið í hinum geysivinsæla bókaflokki Suzanne Collins um Hungurleikana. Spennan er ekki minni hér en í fyrri bókunum og margt kemur á óvart – svo ekki sé meira sagt.
Magnea J. Matthíasdóttir þýddi.
„Collins gerir marga hluti snilldarlega; ekki síst tekst henni hvað eftir annað í kaflalok að skapa óbærilega spennu sem snýr atburðarásinni á hvolf.“
BOOKLIST„Lokabindi þríleiksins um Hungurleikana er enn betra en hin, glæsilega smíðuð og snjöll saga sem er að öllu leyti vel heppnuð.“
PUBLISHERS WEEKLY
Myndlist á Íslandi / Art in Iceland No. 6
3.990 kr.„Þetta tölublað endurspeglar ferðalag listrænna hugmynda um samfélagið,“ segir ritstjórnin. Í blaðinu koma saman lykilraddir, gagnrýnin sjónarhorn og afgerandi augnablik sem mótuðu myndlistarsenuna á síðasta ári. Í blaðinu er einnig fjallað um tilnefningar og verðlaunahafa Íslensku myndlistarverðlaunanna 2026.
Sérstök áhersla er lögð á að skoða fyrirbærið listaverk sem boðbera hugmynda með því að rýna í hvernig skapandi hugsun tekur á sig mynd og verður sýnileg áður en hún festist í tímalínum, mælieiningum og sögulegri skráningu. Þannig varpar blaðið ljósi á lifandi tengsl listrænnar iðkunar og samfélagslegs veruleika.
Í tölublaðinu birtist ítarlegt viðtal við Ástu Fanneyju Sigurðardóttur, fulltrúa Íslands á Feneyjartvíæringnum 2026, um sköpunarferli hennar og undirbúning fyrir tvíæringinn eftir Helenu Sólveigar Aðalsteinsbur. Jonatan Habib Engqvist kynnir fyrir lesendum uppruna og tilurð einkasýningar dönsku stórstjörnunnar Larissu Sansour í Listasafni Reykjanesbæjar. Margrét Elísabet Ólafsdóttir fjallar um ævi og störf Steinu Vasulka í tilefni sýningar hennar í Listasafni Íslands og Listasafni Reykjavíkur. Daría Sól Andrews fer yfir hvernig berskjöldun birtist sem þema í fjölmörgum sýningum á kvennaárinu 2025. Edda Halldórsdóttir greinir frá rannsóknum sínum á fantasíum Kjarvals, Eiríkur Örn Norðdahl fer með lesandann í ferðalag um myndlist á Vestfjörðum og loks tók Hólmar Hólm viðtal við Loga Einarsson, menningar-, nýsköpunar- og háskólaráðherra.
Myndlist á Íslandi hefur sérstöðu í norrænni myndlistarumræðu og nálgast tungumál sem kvikan miðil. Með tvítyngdri útgáfu eru íslenska og enska virkjaðar sem lifandi vettvangur fyrir samtal um samtímalist, þar sem þýðingar eru skilgreindar sem gagnrýnin aðferð sem opnar á tengingar milli hins staðbundna og alþjóðlega. Blaðið er því ekki aðeins árlegt yfirlit heldur vettvangur fyrir ígrundun, samtal og alþjóðlega miðlun íslenskrar samtímalistar. Hönnun tímaritsins er í höndum PSSÁ (Petter Spilde) og gefið út í samstarfi við Myndlistarráð, Myndlistarmiðstöð, Samband íslenskra myndlistarmanna, Listaháskóla Íslands og Listfræðafélag Íslands.
Geirmundar saga heljarskinns
1.290 kr.«Geirmundr heljarskinn sté nú til slíkra virðinga at svá er sagt at hverr maðr á Vestfjörðum vildi sitja eðr standa svá sem hann fyrir sagði.»
Geirmundur heljarskinn var sagður göfgastur allra landnámsmanna á Íslandi. Þó hefur sögu hans aldrei verið haldið á lofti – fyrr en nú. Enda má segja að hann sé, þegar öllu er á botninn hvolft, 21. aldar maður, þótt hann hafi verið uppi fyrir 1100 árum. Bergsveinn Birgisson vakti mikla athygli í Noregi árið 2013 fyrir fræðirit sitt um Geirmund heljarskinn sem hann ritaði á norsku og nefndi Svarta víkinginn. Hér er hins vegar loks hægt að lesa stórbrotna sögu Geirmundar sjálfs. Og kominn tími til.
Bergsveinn Birgisson hefur rannsakað sögu landnámsmannsins Geirmundar heljarskinns um árabil. Hann hefur leitað fanga víða, í fornum ritum, munnmælum og örnefnum, stuðst við fornleifarannsóknir, málfræði og erfðafræði. Hér er komin Íslendingasagan sem fékk ekki að vera með.