Óþægileg ást
990 kr.Delia á von á móður sinni með lestinni til Rómar, en hú skilar sér ekki. Skömmu síðar finnst lík hennar í sjónum við baðstað þar sem fjölskyldan hafði stundum farið í sumarfrí.
Í tengslum við jarðarförina þarf Delia að takast á hendur ferð til æskustöðvanna og um leið á vit erfiðrar bernsku með tvístraðri fjölskyldu. En ekki síst þarf hún að svara knýjandi spurningu: Hver var eiginlega móðir hennar?
Í þessari fyrstu skáldsögu Elenu Ferrante fjallar hún um það efni sem einkennt hefur höfundarverk hennar síðan: flókin og margræð sambönd kvenna. Hér er mæðgnasamband í forgrunni, en einnig samskipti kynjanna, dulin og ódulin, og hvernig konur sem storka karlveldinu eiga erfitt uppdráttar.
Um þetta fjallar Elena Ferrante af þeirri stílgáfu, dýpt og innsæi sem lesendur þekkja af Napólí-fjórleik hennar, og gert hefur hana að einum vinsælasta rithöfundi samtímans. Eftir þessari bók var gerð vinsæl kvikmynd.
Þakkarskuld
990 kr.Teheran, 1978: Nahid og Masood eru 18 ára gömul, ástfangin og byltingarsinnuð og staðráðin í að hrinda ríkisstjórn Íranskeisara og koma á lýðræði. Leynilegar aðgerðir þeirra eru hættulegar en ástríða og æskufjör gefur þeim kraft og áræði. Nótt eina leyfir Nahid yngri systur sinni að koma með þeim á fjölmenn mótmæli þar sem ofbeldi brýst út; Nahid missir tak á systur sinni og allt breytist …
Í kjölfarið neyðast Nahid og Masood til að flýja til Svíþjóðar til að tryggja öryggi sitt – og vegna þess að þau eiga von á barni. Þrjátíu árum seinna liggur Nahid á sjúkrahúsi, veik af krabbameini, og fer yfir líf sitt af dæmafárri hreinskilni þar sem allt er lagt undir.
Þakkarskuld er margrómuð skáldsaga um ást, sekt og drauma um betri tíma, kraumandi af bæði átakanlegri sorg og óslökkvandi lífsgleði.
Höfundurinn, Golnaz Hashemzadeh Bonde er fædd í Íran en uppalin í Svíþjóð.
Páll Valsson þýðir.
Sónata fyrir svefninn
1.290 kr.Ung kona kemur til ókunnugs bæjar, með heimilisfang á bréfmiða og lykla í vasanum. Ferðinni er heitið í íbúð á efstu hæð í gömlu húsi, þar sem ekki er allt sem sýnist. Hún leitar horfins manns og hefur ástæðu til að ætla að hann sé að finna í bænum. En hvernig á að leita þeirra sem ferðast utan eigin líkama?
Sónata fyrir svefninn er önnur skáldsaga Þórdísar Björnsdóttur en frumraun hennar á því sviði, Saga af bláu sumri, fékk frábærar viðtökur lesenda og gagnrýnenda.
„(Þórdís Björnsdóttir) nær fullkomlega að stilla saman þá strengi sem þarf til að skapa eftirminnilega og áhugaverða sögu, sem er bæði staðfesting á þeim hæfileikum sem skáldkonan hefur þegar sýnt og gefur góð fyrirheit um framhaldið.“
Úlfhildur Dagsdóttir, bokmenntir.is, um Sögu af bláu sumri„Eins og viðvarandi fantastiskt augnablik … dökkblár ástaróður til lífsins.“
Ása Helga Hjörleifsdóttir, Víðsjá, um Sögu af bláu sumri
Sólrún
1.290 kr.,,Ég velti því oft fyrir mér hvort laufin verði þess vör þegar þau byrja að fölna. Hvort litabreytingin komi aftan að þeim. Verða þau hissa þegar þau falla niður eða eru þau þá þegar horfin sjálfum sér?“ Sólrún ákveður að láta sig hverfa úr þjónustuíbúð fyrir aldraða og leggur af stað í ferðalag á puttanum. Förinni er heitið í Mývatnssveit en þangað telur hún sig eiga brýnt erindi. Margvíslegt fólk verður á leið hennar og sterkar minningar blandast inn í upplifun hennar, móðurþrá, ást og sekt, og svo dauðinn sem nálgast óðum.
Sigurlín Bjarney Gísladóttir hefur vakið mikla athygli fyrir verk sín sem tilnefnd hafa verið til ýmissa verðlauna. Síðasta bók hennar, ljóðabókin Undrarýmið, hlaut frábærar undirtektir bæði gagnrýnenda og almennra lesenda.
Kristbjörg Þorkelína – saga leikkonunnar Kristbjargar Kjeld
1.290 kr.Fáar leikkonur eiga að baki jafnglæsilegan feril og Kristbjörg Þorkelína Kjeld. Hún hefur lengi verið ein dáðasta leikkona þjóðarinnar. En hvað hefur mótað þessa konu? Hvað beindi henni, ungri stúlku úr Njarðvík, upp á fjalir Þjóðleikhússins? Hver er list Kristbjargar Kjeld? Jórunn Sigurðardóttir ræðir við þessa merku konu um viðburðaríka ævi og afstöðu hennar til listarinnar. Þetta er áhugaverð bók um forvitnilega konu.
Flugnagildran
990 kr.Viðfangsefnin eru þrjú, sagði Skáldið Monterroso: Ástin, dauðinn og flugurnar.
Í þessari einstöku bók tekst líffræðingurinn og rithöfundurinn Fredrik Sjöberg á við flugurnar. Þetta er óvengjulegt meistaraverk, sem hefur verið þýtt á fjölda tungumála og verðlaunað í mörgum flokkum. Skemmtilegt, ljóðrænt, furðulegt. Og síðast en ekki síst: Alveg hrikalega áhugavert!
Sigrún Á. Eiríksdóttir þýddi.
Hinn litlausi Tsukuru Tazaki og pílagrímsár hans
1.290 kr.Á menntaskólaárunum átti Tsukuru Tazaki fjóra bestu vini. Eftirnöfn þeirra allra innihéldu einhvern lit, nema Tazaki. Hann hét engum lit. Frá upphafi fannst honum hann því örlítið útundan.
Dag nokkurn tilkynntu vinir hans að þau vildu hvorki sjá hann né heyra nokkurn tíma aftur.
Allar götur síðan hefur Tsukuru verið eins og svefngengill og engum tengst vinaböndum. Þegar hann kynnist Söru fyllist hann löngun til þess að gera upp fortíðina og komast að því hvað gerðist.
Ingunn Snædal þýddi.
