FNÆS
11.990 kr.Í Fnæs birtast á mjög mörgum blaðsíðum fimm ár af fnæsi yfir öllu frá hversdeginum til heimsmála. Stundum er fnæst af gleði, stundum af reiði og stundum af uppgjöf. Myndasögurnar í bókinni spegla sameiginlega reynslu samfélags sem er oft flókin en oft svo fyndin. Ófullkomleiki manneskjunnar, uppeldi, heimur á vonarvöl, hópefli, menningararfurinn, rútína, sérviska og jólin – ekkert er Lóu Hlín Hjálmtýsdóttur óviðkomandi. Og við megum alltaf leyfa okkur að hlæja smá, meira að segja að hlutum sem eru óþolandi.
„Með síkvikum huga rannsakar Lóa bæði stóru og litlu brestina í samfélaginu okkar og í tilverunni allri. Hún sér hið óbærilega og gerir svo úr því eitthvað óbærilega fyndið.“ – Haukur Þorgeirsson, rannsóknarprófessor við Stofnun Árna Magnússonar í íslenskum fræðum
Vegur allrar veraldar (kilja)
4.690 kr.Haustið 1479 kemur kona norður yfir Kjöl og teymir hest undir gömlum manni. Skáldið Sveinn döggskór Þórðarson er kominn í Reynistaðarklaustur til að deyja. Þó ekki fyrr en hann hefur skrásett sannleikann um atburðina í Rifi, þegar Englendingar drápu Björn Þorleifsson, hirðstjóra konungs á Íslandi. Vígið kveikti ófriðarbál innanlands og utan, og kona Björns, Ólöf ríka Loftsdóttir, hefndi bónda síns svo grimmilega að sögur hafa gengið um það allar götur síðan.
En hvað af því er satt og hvað er logið, og hverjum leyfist að segja söguna?
Löngu síðar, á tímum samfélagsmiðla og örbylgjupizza, reynir sagnfræðingurinn Eyjólfur Úlfsson að endurheimta akademískan orðstír sinn eftir að hafa óvart eyðilagt ómetanlegt fornrit. Þær hrakfarir leiða hann til Kaupmannahafnar, þar sem hann rekur sig eftir ólíkindalegri slóð handrita og miðaldaklæða í átt að sannleikanum um atburðina í Rifi.
Fimmtánda öldin er öldin sem týndist í Íslandssögunni, þegar þjóðin lenti skyndilega í hringiðu evrópskra stjórnmála og viðskiptahagsmuna. Hér stíga helstu persónur hennar ljóslifandi fram: riddarar og sjóræningjar, konungar, hirðstjórar og höfðingjar, en líka fólkið sem þjónaði þeim og reyndi að ávinna sér frelsi og frið á vægðarlausum upplausnartímum.
Vegur allrar veraldar skálkasaga er sjálfstætt framhald Hamingju þessa heims riddarasögu, sem kom út 2022 og hlaut tilnefningu til Íslensku bókmenntaverðlaunanna.
Huldukonan (kilja)
4.690 kr.Konurnar í Lohr fjölskyldunni skilja ekki að Sigvaldi þeirra, með alla sína augljósu mannkosti, hafi aldrei gengið út. Ennfremur fá þær ekki skilið þá fráleitu ákvörðun hans að gerast einsetumaður í eyðivík. Þær eru raunar hættar að hnýsast í hagi Sigvalda, því í hvert skipti verður augnaráð hans átakanlega tregafullt.
Dag einn birtist Sigvaldi á dyraþrepi móður sinnar með mánaðargamla stúlku í fanginu og neitar að svara því hver sé móðir barnsins. Konurnar í fjölskyldunni hefja sína eigin rannsókn á málinu og smám saman hrannast sönnunargögnin upp: saga Lohr ættarinnar, þjóðsögurnar í Dýrleifarvík, leyndardómur um týnt barn og móður sem hvarf, undarlegir draumar, óvenjuleg hegðun Sigvalda og dulmagn hamranna í hlíðinni.
Nýtt nafn – Sjöleikurinn VI-VII
4.890 kr.Nýtt nafn er þriðja og síðasta bindið í stórvirki norska Nóbelshöfundarins Jons Fosse, hinum svonefnda Sjöleik. Hér er á ferðinni seiðmagnað verk þar sem lífsbarátta og hugsjónir mætast. Undir sléttu yfirborði ólga heitar tilfinningar og glíma við drykkjuskap tekur sinn toll. Í samspili gleði og sorgar er samt óbilandi trúin á náð Guðs alltumlykjandi.
Pensilskrift
4.890 kr.Tímamótaverk með hátt í 200 smáprósum sem rúma ótal persónur, þankabrot og atburði með fjölþættum spunaþráðum. Upphaflega gefin út ásamt systurbókinni, Þöglu myndunum, haustið 2022 og hlaut frábærar viðtökur en seldist fljótlega upp. Þessi nýja útgáfa er hluti af ritsafni Gyrðis Elíassonar.
Þöglu myndirnar
4.890 kr.Margradda og magnað verk! Vel á annað hundrað smáprósar, þar sem birtist fjöldi persóna og alls kyns óvænt atvik eiga sér stað. Ásamt systurbókinni, Pensilskrift, sem kom samtímis út haustið 2022, hlaut bókin afar góðar viðtökur og seldist fljótlega upp. Þessi nýja útgáfa er hluti af ritsafni Gyrðis Elíassonar.
Ljóðasafn IV – Gyrðir Elíasson
7.390 kr.Fjórða bindið af ljóðasafni Gyrðis geymir 3 bækur sem hafa verið ófáanlegar um langt skeið en eru nú saman komnar í einu lagi í vandaðri heildarútgáfu á verkum skáldsins. Hér birtast Upplitað myrkur, Nokkur almenn orð um kulnun sólar og Hér vex enginn sítrónuviður. Ómissandi verk í safn allra bókaunnenda.
Ótíð í víti: Lífsreynslusaga
4.890 kr.Einstök og allt öðruvísi bók úr smiðju Gyrðis Elíassonar. Hér deilir hann með lesendum erfiðri lífsreynslu og dregur ekkert undan. Átakanleg og einlæg frásögn. Sannkölluð lífsreynslusaga.
Algjör Perla
4.990 kr.Algjör Perla er glæný bók úr smiðju Jónínu Leósdóttur, sem hefur skrifað á þriðja tug bóka – þar á meðal tvær geysivinsælar glæpasagnaseríur kenndar við Eddu og Sáló ehf. Alþekkt kímnigáfa Jónínu nýtur sín sérstaklega vel í þessari margslungnu og hlýlegu sögu sem kemur sífellt á óvart.
Þegar Perla rankar við sér á Landspítalanum eftir heilablóðfall snýst hennar fyrsta hugsun aðeins um eitt: Bévað líkið, sem getur alveg ómögulega verið áfram þar sem það er.
En hvað getur hálflömuð manneskja á áttræðisaldri tekið til bragðs í slíkri stöðu? Vitanlega getur hún ekki blandað nokkrum í svo viðkvæmt mál. En það má komast ansi langt á þrjóskunni og hugvitinu einu saman … og stundum fær kona í neyð liðsauka úr óvæntustu átt.
Þórarinn Eldjárn – Úrval smásagna
9.990 kr.36 smásögur úr áður útgefnum bókum, 1981-2021.
Kristján Þórður Hrafnsson valdi sögurnar og ritaði eftirmála.
Í hæfilegu magni
5.190 kr.Kraftmikil ljóðabók um litríka uppreisn gegn þeim þrönga stakki sem samfélagið sníður konum. Bók sem er of hávær, of fjörug og fjallar um allt of stórar tilfinningar.
Í hæfilegu magni er fyrsta ljóðabók Heiðu Vigdísar Sigfúsdóttur (f. 1992) en hún bar sigur úr býtum í handritasamkeppni Forlagsins, Nýjum röddum, árið 2022 með sögunni Getnaði. Saga hennar Stúlkan sem skemmdi (næstum því) jólin varð hlutskörpust í samkeppninni um Jóladagatal Borgarbókasafnsins og Bókmenntaborgarinnar 2021.
Og svo varð ég forsetafrú
6.990 kr.Eliza Reid rifjar hér upp eftirminnilegan tíma sem forsetafrú Íslands og veitir lesendum innsýn í heim þar sem formlegheitin ráða ríkjum og opinberar heimsóknir og móttökur eru stór hluti af starfinu. Hún lét til sín taka í því sem henni þótti skipta máli, var óhrædd við að tala íslensku með erlendum hreim og hló að eigin mismælum. Hún talaði fyrir jafnrétti kynjanna og gerði góðlátlegt grín að þeirri þversögn að vera fyrst og fremst skilgreind út frá afrekum eiginmannsins.
Í bókinni segir Eliza einnig frá uppvexti sínum í Kanada, árunum í Bretlandi, ferðalögum á fjarlægar slóðir og hvernig það var að flytja til Íslands og verða útivinnandi fjögurra barna móðir.
Köngurváfa
5.190 kr.Köngurváfa er önnur ljóðabók Arndísar Þórarinsdóttur en þar tekst hún á við tilvistina með textum sem spretta úr upprunanum og horfa til framtíðar. Bókin spinnur þræði um formæður, fluguhnýtingar, ferðalög og stórtónleika heilmynda ABBA-flokksins, svo fátt eitt sé nefnt.
Fyrri ljóðabók Arndísar, Innræti, hlaut góðar viðtökur og var tilnefnd til Íslensku bókmenntaverðlaunanna árið 2020. Arndís er jafnframt ötull barna- og ungmennabókahöfundur og hefur meðal annars fengið Íslensku bókmenntaverðlaunin, Fjöruverðlaunin og Barnabókaverðlaun Reykjavíkurborgar fyrir verk sín, auk tilnefninga til Barna- og unglingabókmenntaverðlauna Norðurlandaráðs, Þýsku barnabókaverðlaunanna og Minningarverðlauna Astridar Lindgren.
Kona að hálfu
4.390 kr.Ponna og Kali reyna hvað þau geta til að eignast barn en allt kemur fyrir ekki. Síðasta hálmstráið er lokakvöld árlegrar musterishátíðar, þegar allir karlar eru guðir, en það gæti reynst þeim dýrkeypt.
Perumal Murugan (f. 1966) er þekktasti rithöfundur Tamli Nadu-héraðs á Indlandi og jafnframt eini tamílski höfundurinn sem hlotið hefur tilnefningu til alþjóðlegu Booker-verðlaunanna. Lýsingar hans á helgisiðum héraðsins í Kona að hálfu vöktu mikla reiði trúarhópa á svæðinu og mátti Murugan sæta ofsóknum og ákærum, sem hæstiréttur í Madras ógilti síðar. Kona að hálfu hefur verið þýdd á átján tungumál. Áður hefur komið út á íslensku bókin Saga af svartri geit eftir sama höfund.
Guli hundurinn
4.690 kr.Í vindasömum strandbæ að nafni Concarneau særist vínkaupmaður nokkur hættulega í skotárás. Það hrindir af stað röð undarlegra atburða og brátt grípur sig mikill ótti í bænum. Svo virðist sem einhver ætli sér að ráða alla áhrifamenn bæjarins af dögum.
Maigret lögregluforingi tekst á við rannókn málsins sem leiðir í ýmsar áttir og þar á meðal til fölleitrar þjónustustúlku og undarlegs hunds sem læðist með skuggsælum veggjum …
Belgíski rithöfundurinn Georges Simenon (1903–1989) hóf rithöfundaferil sinn í París um tvítugt. Hann sló í gegn með bókum sínum um Maigret en alls skrifaði hann rúmlega 400 skáldsögur.
Guðmundur J. Guðmundsson íslenskaði.
„Maigret-bækurnar eru tímalausar rétt eins og París.“ – The Washington Post
„Einn mikilvægasti rithöfundur tuttugustu aldar.“ – Gabriel Garciía Márquez
„Maigret er á sama stalli og Sherlock Holmes og Poirot í musteri ódauðlegra leynilögreglumanna í glæpasögum.“ – People
„Frábær … Einstakur sögumaður.“ – The Observer
Minnisblöð veiðimanns (kilja)
5.390 kr.Skáldjöfurinn Ívan Túrgenev kynntist snemma bágum kjörum rússneskra bænda og miskunnarleysi þeirra sem réðu yfir þeim. Hann ólst upp á landareign móður sinnar, sem þótti með eindæmum óvægin og grimm, en hún hafði yfir að ráða meira en fimm þúsund sálum eins og ánauðugir bændur voru gjarnan nefndir. Reynsla Túrgenevs úr uppvextinum varð honum innblástur í þessa bók, Minnisblöð veiðimanns, sem kemur nú út í fyrsta sinn á íslensku.
Í Minnisblöðum veiðimanns ferðast sögumaður um sveitir Rússlands og hittir landeigendur, ráðsmenn, bændur og bóndakonur auk annarra minnisstæðra persóna. Hann lýsir þessu fólki með raunsönnum og eftirminnilegum hætti en sagan er þó ekki síður óður til rússneskrar náttúru – birkiskóganna og sveitarinnar.
Þegar bókin kom út árið 1852 var Túrgenev handtekinn og sendur í útlegð á ættaróðal sitt. Bókin er þó sögð hafa haft mikil áhrif á Aleksander II. Rússakeisara en það var hann sem steig loks það afdrifaríka skref að aflétta bændaánauðinni árið 1861.
Áslaug Agnarsdóttir íslenskaði og ritaði eftirmála.
Suðurríkjaherforinginn frá Big Sur
4.690 kr.Í þessari bráðfyndnu og furðulegu sögu slást lesendur í för með félögunum Jesse og Lee. Sá síðarnefni er sannfærður um að hann sé afkomandi gleymds hershöfðingja úr bandaríska borgarastríðinu. Frá hriplekum forstofum í San Francisco liggur leiðin til klettaveggja Big Sur þar sem lífið snýst um froskakvak, vináttu, ódýr vín, blekkingar, hamingju og leitina eilífu að tilgangi lífsins.
Suðurríkjaherforingi frá Big Sur var fyrsta skáldsaga stílsnillingsins Richard Brautigan og er löngu orðið klassískt verk í bandarískum nútímabókmenntum.
Þórður Sævar Jónsson íslenskaði.
Stíll hans og vitsmunir miðla svo mikilli orku að … Brautigan … fær öll skilningarvitin til að anda. – Newsweek
Heillandi, pirrandi og hræðilega fyndin bók.– San Francisco Chronicle
Ótrúleg saga … Þú verður sáttari við heiminn eftir að hafa lesið hana. – Los Angeles Examiner
Myndlist á Íslandi / Art in Iceland No. 6
3.990 kr.„Þetta tölublað endurspeglar ferðalag listrænna hugmynda um samfélagið,“ segir ritstjórnin. Í blaðinu koma saman lykilraddir, gagnrýnin sjónarhorn og afgerandi augnablik sem mótuðu myndlistarsenuna á síðasta ári. Í blaðinu er einnig fjallað um tilnefningar og verðlaunahafa Íslensku myndlistarverðlaunanna 2026.
Sérstök áhersla er lögð á að skoða fyrirbærið listaverk sem boðbera hugmynda með því að rýna í hvernig skapandi hugsun tekur á sig mynd og verður sýnileg áður en hún festist í tímalínum, mælieiningum og sögulegri skráningu. Þannig varpar blaðið ljósi á lifandi tengsl listrænnar iðkunar og samfélagslegs veruleika.
Í tölublaðinu birtist ítarlegt viðtal við Ástu Fanneyju Sigurðardóttur, fulltrúa Íslands á Feneyjartvíæringnum 2026, um sköpunarferli hennar og undirbúning fyrir tvíæringinn eftir Helenu Sólveigar Aðalsteinsbur. Jonatan Habib Engqvist kynnir fyrir lesendum uppruna og tilurð einkasýningar dönsku stórstjörnunnar Larissu Sansour í Listasafni Reykjanesbæjar. Margrét Elísabet Ólafsdóttir fjallar um ævi og störf Steinu Vasulka í tilefni sýningar hennar í Listasafni Íslands og Listasafni Reykjavíkur. Daría Sól Andrews fer yfir hvernig berskjöldun birtist sem þema í fjölmörgum sýningum á kvennaárinu 2025. Edda Halldórsdóttir greinir frá rannsóknum sínum á fantasíum Kjarvals, Eiríkur Örn Norðdahl fer með lesandann í ferðalag um myndlist á Vestfjörðum og loks tók Hólmar Hólm viðtal við Loga Einarsson, menningar-, nýsköpunar- og háskólaráðherra.
Myndlist á Íslandi hefur sérstöðu í norrænni myndlistarumræðu og nálgast tungumál sem kvikan miðil. Með tvítyngdri útgáfu eru íslenska og enska virkjaðar sem lifandi vettvangur fyrir samtal um samtímalist, þar sem þýðingar eru skilgreindar sem gagnrýnin aðferð sem opnar á tengingar milli hins staðbundna og alþjóðlega. Blaðið er því ekki aðeins árlegt yfirlit heldur vettvangur fyrir ígrundun, samtal og alþjóðlega miðlun íslenskrar samtímalistar. Hönnun tímaritsins er í höndum PSSÁ (Petter Spilde) og gefið út í samstarfi við Myndlistarráð, Myndlistarmiðstöð, Samband íslenskra myndlistarmanna, Listaháskóla Íslands og Listfræðafélag Íslands.
Sjötíu bragandi dúfur
3.990 kr.Ljóðaflokkur um samband tveggja bræðra og kærleikann á milli þeirra en þeir búa við mikið ofbeldi innan veggja heimilisins. Sá yngri deyr sautján ára gamall af slysförum og höfundur breytir harmi sínum í sigur með menntun og skáldskap.
Flokkur 38 ljóða til heiðurs yngsta bróður höfundar. Í ljóðunum birtist kærleiksríkt samband þeirra bræðra sem búa við erfiðar aðstæður. Eldri bróðurinn langar að vernda þann yngri og leiða til betra lífs innan fjölskyldunnar og síðan utan hennar. Aðstæður hindra hann þó í því er á líður. Yngri bróðirinn stendur því um síðir einn andspænis ofbeldinu á heimilinu og villist æ meira afvega svo afbrot og fíkn blasa við. En með umhyggju og hlýju systur hans í Vestmannaeyjum nær hann að snúa við blaðinu fjarri heimili foreldranna. Hann er kominn á réttu brautina þegar hann deyr af slysförum aðeins sautján ára. Þá heitir eldri bróðirinn því að umbylta lífi sínu með því meðal annars að ganga menntaveginn og gerast rithöfundur. Í lokakafla bókarinnar tekst honum að snúa harmi í sigur. Tvö ljóðanna hlutu 1. og 2. verðlaun í ljóðasamkeppni Ljósberans haustið 2023.
squat
6.990 kr.Byggingin sjálf var óvenjuleg. Um var að ræða fyrrum heilsugæslustöð sem stóð við gatnamót í Saint-Gilles hverfinu í Brussel, mynduð úr tveimur samliggjandi húsum sem stóð til að breyta í íbúðaeiningar […] Uppsetning sýningarinnar tók hins vegar aðeins einn dag. Eins og venjulega var framkvæmdin einföld og unnin í þögn, án þess að aukatekið orð væri sagt, samkvæmt því óskráða verklagi sem við höfum margoft fylgt og felur í sér endurteknar og nánast ósjálfráðar hreyfingar sem við kunnum utanbókar og kenna má við innsæi. Í þessu tilviki voru staðsetningar þegar ákveðnar. Eftir að hafa dvalið fimmtán daga í byggingunni þar sem við höfðum hreiðrað um okkur í huganum í hverju skoti, má segja að teikningarnar, málverkin og ljósmyndirnar hafi nánast fundið sinn stað sjálfkrafa. Um leið og við skröpuðum hvern flöt, grannskoðuðum við hann og þá má segja að hann hafi kallað á tiltekið verk. Veggirnir tóku ákvörðun fyrir okkur, við þurftum einungis að leggja við hlustir.