Vígroði
1.290 kr.Auður djúpúðga elur upp son sinn á eigin jörð á Katanesi. Hún hefur haldið sig fjarri Suðureyjum frá því að leiðir hennar og Ólafs hvíta Dyflinnarkonungs skildu af ótta við að Ketill flatnefur, faðir hennar, gefi hana manni á ný.
Að veturnóttum 865 kemur hún þó í föðurhús, til brúðkaups bróður síns og dóttur Ingólfs Arnarsonar. Þar spá dísirnar því að vígroða muni brátt slá á víkinga í Vesturhafi. Og víst horfir ófriðvænlega á norðanverðum Bretlandseyjum þar sem innfæddir veita norrænum mönnum æ meiri mótspyrnu og Orkneyjajarl ásælist aukin völd. Þá ræðst Dyflinnarkonungur inn í Péttland, öllum að óvörum, og leiðir þeirra Auðar liggja saman að nýju …
Vígroði er framhald af skáldsögunni Auður sem kom út 2009, naut geysilegra vinsælda og var tilnefnd til Íslensku bókmenntaverðlaunanna.
Gratíana
1.290 kr.Langþráð framhald Hansdætra. Leiftrandi örlaga- og þroskasaga ungrar konu sem tekst á við sjálfa sig og viðteknar venjur í byrjun tuttugustu aldar.
Þær framtíðarvonir sem Gratíana bar í brjósti sér eru að engu orðnar eftir þrjú ár í Bótarbugt en Evlalía móðir hennar er óbuguð enn. Með kænsku hreyfir hún við lífshjólinu og markar nýja stefnu, ekki aðeins fyrir sjálfa sig, heldur ekki síst Gratíönu og Ásdísi. Glóð kvenréttinda lifir í hjarta Gratíönu en samhliða kvikna aðrir logar sem hún brennir sig á, skilur ekki til fulls og veit ekki hvort hún vill glæða eða slökkva.
Speglahúsið
1.990 kr.Miðaldra hárgreiðslukonan Rósa leggur skærin á hilluna, flytur austur í Mjóafjörð og kemur á fót óvenjulegri ferðaþjónustu. Meðan ferðamenn setja sig í spor Lísu, sem lá lömuð þar um miðja síðustu öld, bakar Rósa fyrir kaffihúsið og hugsar til ömmu sinnar sem sá um Lísu og heimilið.
Mögnuð saga frá höfundi Hansdætra.
Hvert orð er atvik
1.490 kr.Hvert orð er atvik eftir þjóðskáldið Þorstein frá Hamri er átjánda ljóðabók hans með frumbirtum ljóðum. Þorsteinn yrkir ljóð sem hitta fólk í hjartastað, stundum grimm og áreitin, í annan tíma ljúfsár og blíð. Hvert orð er atvik er bók sem vísar í senn til sögu og fortíðar og inn í samtíðina þar sem þessi heiti, hreini skáldskapur á brýnt erindi og krefst íhugunar og afstöðu.
Þorsteinn frá Hamri hefur fyrir löngu tryggt sér sess meðal fremstu ljóðskálda sem ort hafa á íslenska tungu. Allt frá því hann gaf út sína fyrstu ljóðabók, Í svörtum kufli (1958), aðeins tvítugur að aldri, hefur hann mótað og fágað ljóðstíl sinn, og oft er talið að honum hafi tekist sérlega vel að bræða saman hina gömlu ljóðahefð og stílbrögð nýrrar aldar, ljóðmál módernismans.
Undir Hraundranga: Úrval ritgerða um Jónas Hallgrímsson
1.990 kr.Undir Hraundranga er úrval ritgerða um Jónas Hallgrímsson frá 19. öld til nútímans. Hér er að finna fjölbreytt skrif um ævi og örlög Jónasar, um vísindastörf hans og hugmyndaheim, um áhrifavalda og umhverfi hans. Fjallað er um mörg áhugaverðustu verk skáldsins og tekist á um túlkun þeirra. Elstu ritgerðirnar eru eftir Konráð Gíslason og Hannes Hafstein og hinar yngstu eru frá allra síðustu árum. Auk núlifandi fræðimanna og skálda eiga margir þekktir höfundar frá 20. öld efni í bókinni. Meðal þeirra eru Einar Ól. Sveinsson, Halldór Laxness, Jakob Benediktsson, Kristinn E. Andrésson, Sigurður Nordal og Svava Jakobsdóttir. Bókin er gefin út í tilefni af því að tvær aldir eru liðnar frá fæðingu Jónasar. Ritstjóri er Sveinn Yngvi Egilsson sem einnig ritar inngang.
Ofvitinn
990 kr.Þey, þey! Fótatak upp stigann. Hver? Vill hún strax fara að byrja á dönskutímunum? Það er barið. Hrekk við.
Kom!
Og inn í herbergið kemur hávaxin stúlka, dökkhærð, hrokkinhærð, ívið kinnbeinahá, rjóð í andliti, fersk og sælleg, hvítar tennur, drifhvítar hendur, sindrandi eldsveipur í mynd hreinnar meyjar. Hún gengur einörðum skrefum inn gólfið og segir í dálítið háum ögrandi tón: Gott kvöld! Og um leið skýtur hún á móti mér tinnudökkum, leiftrandi augum. Guð í hæstum hæðum! Þvílíkt augnaráð! Þvílíkt líf í þessu andliti! Sú er nú ekki alveg laus við að hafa svolítið af sál. Hún hlýtur að hafa afar mikið vit á skáldskap. Skyldi hún vera með Millilandafrumvarpinu?Haustið 1909 hóf Þórbergur Þórðarson nám við Kennaraskólann. Lærifeðurnir ollu honum sárum vonbrigðum og reyndust ófærir um að leysa lífsgátuna. Þórbergur bjó í Bergshúsi á Skólavörðustíg við sult og seyru, en hélt huganum heiðum og leit til stjarna á síðkvöldum. Námi sínu, félögum í Bergshúsi, skáldagrillum, stúkustandi, fyrstu ástinni og þorpslífinu í Reykjavík þessara ára lýsir Þórbergur snilldarlega í Ofvitanum, sem er ein ástsælasta bók hans.
Structuralist Poetics: Structuralism, Linguistics and the Study of Literature
990 kr.A work of technical skill as well as outstanding literary merit, Structuralist Poetics was awarded the 1975 James Russell Lowell Prize of the Modern Language Association. It was during the writing of this book that Culler developed his now famous and remarkably complex theory of poetics and narrative, and while never a populariser he nonetheless makes it crystal clear within these pages.
Afstæðiskenningin
1.490 kr.Þeir eru fáir sem ekki hafa heyrt um Albert Einstein, höfund Afstæðiskenningarinnar, og má heita óþarft að kynna þennan mesta eðlisfræðing 20. aldar enda er nafn hans löngu orðið að samnefnara fyrir snilligáfu. Færri kunna þó skil á afstæðiskenningunni sjálfri sem varð nýr grundvöllur eðlisfræðinnar og hefur haft svo ríkuleg áhrif á heimsskoðun nútímamanna, heimspeki og fræði.
Í þessari bók, sem upphaflega kom út árið 1916, setur Einstein almennu og takmörkuðu afstæðiskenninguna fram á skýran og tiltölulega aðgengilegan hátt. Raunar hafði hann áður en kenningin kom fram þegar unnið afrek á sviði eðlisfræðinnar, meðal annars skrifaði hann grundvallarritgerðir í skammtafræði þótt hann teldi lengst af að þeirri kenningu væri ábótavant. Afstæðiskenningin varð til af viðleitni Einsteins til að finna almenn og algild lögmál sem hann taldi að ekki yrðu leidd beint af staðreyndum. Takmarkaða og almenna afstæðislögmálið eru slík lögmál en Einstein varð fljótlega ljóst að til að setja þau fram þyrfti að endurskoða hugmyndir almennrar skynsemi um tíma og rúm og líta á þau sem fjórvíðan rúmtíma því ella þyrfti að gera ráð fyrir ólíkum hreyfingarlögmálum fyrir þann sem er á stöðugri hreyfingu og þann sem er í stöðugri kyrrstöðu. Almenna afstæðislögmálið má orða þannig að þær jöfnur sem lýsi náttúrulögmálunum séu óbreyttar í öllum leyfilegum kerfum sem tengd eru hvert öðru með almennum samfelldum tengijöfnum og skýrir alla hegðun hluta í þyngdarsviði út frá eiginleikum rúmsins án þess að gera ráð fyrir kröftum sem orka á þá.
Með kenningum Einsteins varð umbylting í eðlisfræði þar sem aflfræði Newtons vék fyrir hinni nýju afstæðiskenningu. Samtímis var lagður grunnur að vísindalegri heimsfræði sem fjallar um gerð og sögu alheimsins og það er sú gerð eðlisfræðinnar á 20. öld sem hvað mest hefur heillað jafnt leika sem lærða. Fá rit eðlisfræðinnar eiga því jafnmikið erindi við þá sem vilja skilja heimsmynd nútímans.
Þýðing: Þorsteinn Halldórsson.
Inngang ritar Magnús Magnússon.
