Tómas Jónsson metsölubók

„Hver er Tómas? Er hann við öll? Er hann tákn íslensku þjóðarinnar eins og hún er í dag, andlega og líkamlega karlæg?“

Tómas Jónsson metsölubók vakti bæði úlfúð og aðdáun þegar hún kom út árið 1966. Menn skiptust í flokka, með eða á móti skáldverkinu og margir sökuðu höfundinn um niðurrifsstarfsemi. Þar örlaði hvergi á „heilbrigðu mótvægi við sorann“. En aðrir tóku Tómasi Jónssyni afburðavel og spáðu nýjum tímum í íslenskum bókmenntum.

„Kraumandi seiðketill, þar sem nýtt efni, nýr stíll kann að vera á seyði. Fátt er líklegra en að sagan verði þegar frá líður talin tímamótaverk í bókmenntaheiminum: Fyrsta virkilega nútímasagan á íslensku.“
– Ólafur Jónsson

„Bókin er borin uppi af furðulega sterkri skynjun og næmi sem vel má kalla ofnæmi… myndir hennar eru hlaðnar upp af satanísku fjöri… Það verður bæði auðveldara og erfiðara að skrifa skáldsögur á íslensku eftir tilkomu Tómasar Jónssonar.“
– Árni Bergmann

„Guðbergur Bergsson hefur í ritum sínum brotið nýjum veruleika braut inn í íslenskar bókmenntir, auðgað þær af nýrri tóntegund.“
– Sigfús Daðason

Ný útgáfa með formála höfundar.