Tilraun um heiminn

Gerir heimspeki gagn?
Er andinn ódauðlegur?
Er geðveiki til?
Á meirihlutinn að ráða?
Skiptir réttlæti máli?

Þessar stóru spurningar eru viðfangsefni bókarinnar. Tilgangi sínum með ritun hennar lýsir höfundur svo: „Kver mitt er ekki kennslubók í samtímaheimspeki, hlutlaus endursögn á kenningum helstu heimspekinga, heldur er það tilraun til frjálslegrar heimspekiiðkunar. Frjálsleg iðkun heimspeki leyfir manni að henda á lofti glefsur héðan og þaðan, og leika sér að þeim eftir eigin höfði til að komast að eigin niðurstöðum.“

Auk þess að vekja til umhugsunar verður þessi leikur hin besta skemmtun í meðförum höfundar, enda er hann ritfær mjög. Efnið er sett fram á ljósu og lipru máli, svo hverjum manni má vera það aðgengilegt.

Þorsteinn Gylfason er prófessor í heimspeki við Háskóla Íslands og hefur ritað og rætt margt um fræði sín og önnur málefni.